الطبيييييخ
عايزة اكتب لك بانتظام أكتر من كدة
مش كل سنة بوست!
لو فضلت على المعدل دة مش هتتعلمي ومش هتاكلي
:)
النهاردة عايزة اقوللك حاجة أساسية جداً علشان أبقى خلّصت ضميري
إزاي نعمل الطبيخ؟
:)
أيوة، الطبيخ اللي مفترض يكون عماد أي سفرة في أي بيت(مين عماد؟ )، هو صحيح الطبيخ مش أساسي في بيتنا، بس هو عند ناس كتير كدة وهو ضروري لأسباب كتير، الفكرة إني عايزة أقوللك الدنيا ماشية إزاي في موضوع الطبيخ دة من باب التأريخ يعني
..
أولاً: الطبيخ/ الخضار كل البيوت المصرية من قديم الأزل بتعمله كوجبة أساسية مع الأرز معظم أيام الأسبوع
ثانياً: الطبيخ قد يكون بلحم أو أورديحي، الكلمة دي تاريخية ولازم تعرفيها علشان ما تندثرش ومعناها خضاروأرز من غير لحمة، فيه مصريين كتير بيسمو البروتين زفر مش عارفة ايه العلاقة
ثالثاً: الطبيخ في بيوت الفلاحين الفقراء زمان كان شيء عزيز وغالي مادام فيه لحمة، وكان بيحصل مرة أسبوعياً في الأجازة الأسبوعية وبقية الأسبوع أي بتنجان مقلي، تأريخ مهم بردو
رابعا: الطبيخ بيكون له تأثير كويس على المعدة لو خفيف ومُدمر لو تقيل، وعامة بيحافظ على نسبة السوائل في الجسم لأنه أساساً خضار
خامساً: وهي دي المفاجأة، إن الطبيخ معظمه بيتعمل بطريقة واحدة بس يمكن فيه اختلافات بسيطة من صنف لصنف
....
الطريقة بتاعة أي طبيخ: بصل مبشور يحمر في قليل من الزيت/السمن، وقبل ما يصفر تضيفي ثوم مفروم ( المقدار بصلة إلى فصين ثوم)
وبعدين تضيفي الصلصة والشوربة( معلقتين وكوباية) أو عصير الطماطم والشوربة (كوباية وكوباية)
وبعدين تضيفي الخضار المغسول والتوابل ( فلفل أسود وزنجبيل مبشور وخللي الملح للآخر)
لو استعملتي صلصة ممكن تحطي الخضار على طول
ولو استعملتي عصير طماطم استني لما يتسبّك بمعني يبقى سميك شوية- صحياً ما تستنيش اوي لما يتسبك علشان يبقى أخف
وبعدين قرب تمام سوا الخضار( ابقي دوقي) ضيفي اللحمة المسلوقة والملح
....
....أسئلة
الشوربة بتيجي منين؟
الشوربة بتيجي من سلق اللحمة :) اللي هي انك تغلي مياه وتغسلي قطع اللحم وتحطيها لما المياه تغلي وتضيفي بصلة متقشرة وشوية توابل ( حبهان ومستكة وفلفل اسود وزنجبيل وروزماري جاف وورق لاورا) وبتغلي لمدة ساعة ونصف في المتوسط
وممكن طبعاً تستعملي الحلة البريستو
...
طنط بتنجانة بتقوللي اني باطبخ غلط؟
لا إنتي صح وهي صح بس هي ممكن تكون بتحط اللحمة وهي بتحمر البصل والثوم في الأول خالص، كل الفرق ان هي مش هيبقى عندها شوربة وكل مرقة اللحمة هتبقى في الخضار، لكن انتي ممكن تعملي شوية شوربة جنب الخضار دة( بلسان العصفور أو أي حاجة)
طريقة طنط بتنجانة لو حبتيها خللي بالك انك بعد نص ساعة تقريباً من غليان اللحمة في البصل لازم تحطي الخضار، علشان يبقى الاجمالي ساعة ونص
....
كل الخضار زي بعضه؟
أكيد لأه
البسلة مثلاُ ( وبدات بيها لأنها أكلتك المفضلة) بتتحط هي والجزر من الأول للآخر عادي
لكن لو عملتي تورلي وزودتي عليهم بطاطس وفاصوليا، حطي الفاصوليا مع البسلة والجزر وخللي البطاطس للآخر علشان بتستوي بسرعة
الفاصوليا مثلاً طعمها بيبقى أحلى لما ما تحمريش البصل والتوم أوي وماتسبكيش الصلصة وتحطي الفاصوليا الخضراء على طول
البامية لازم تغسليها كويس أوي وتعصري ليمون وانتي بتحطيها في الصلصة
صينية البطاطس لها وضع مختلف :)
والقلقاس هاعمل له بوست لوحده :)
اللوبيا اللي بعين سودة :) بتتسلق وتتصفى الأول قبل ما تتحط في البصل والصلصة( اللي اسمهم مع بعض بالمناسبة التسبيكة)
السبانخ بتتقطع بالسكينة وتتغسل 999 مرة وتحطي شوربة قليلة اوي لأنها بتنزل مياه من ورقها كتير ويفضل تحطي مع البصل والثوم بتاعها حمص طبيخ مغسول بيبقى طعمها حلو أوي بيه
الكوسة اعمليها عادي خالص بس خللي بالك بتستوي في تلت ساعة تقريباً
مش فاكرة أي خضار تاني :)
Comments
Post a Comment